‘हामीले डिपिआर बनाएर सुरु गरेका योजनाहरूले अहिले पूर्णता पाइरहेका छन्, जिल्लाका ठूला सडक विस्तारमा नेकपा एमालेको पहलका प्रमाणहरु म्याग्देली जनतालाई थाहा छ’ उम्मेदवार श्रेष्ठले भन्नुभयो । बेनी दरबाङ सडकमा समानुपातिक उम्मेदवार नरदेबी पुनले आफ्नो प्रदेश सभाबाट प्राप्त हुने बजेट लाम्पाटा क्षेत्रमा कालोपत्रे, मंगला शिक्षा क्याम्पसको भौतिक पूर्वाधारसहित पश्चिम म्याग्दीका विभिन्न विकास निर्माणका योजनाहरुको बारेमा खुल्ला बहस गर्न तयार रहेको उम्मेदवार श्रेष्ठको भनाइ छ ।

कार्यक्रममा म्याग्दीभित्र र जिल्लासँग जोड्ने अन्य ठूला सडकहरु विस्तार तथा स्तरोन्नतिका लागि नेकपा एमालेको नेतृत्वको सरकारबाट भएका कामलाई समेत गलत प्रचार भएको बताइएको थियो । मूल निर्वाचन प्रचारप्रसार कमिटीको आयोजनामा बिहीबार धवलागिरि गाउँपालिका–५, मल्कबाङ, मलम्पार, वडा नं ६ मराङ, बुल गाउँका साथै मालिका गाउँपालिका–७, बाईन्दाफाँटमा आयोजित मतदाता भेटघाटमा जिल्लामा पिछडिएका क्षेत्र, गाउँवस्ती र टोलको विकासमा विशेष ध्यान दिने बताउँदै विगतमा आफू निर्वाचन हार्दा पनि म्याग्देली जनताको साथमै रहेर जिल्लाको सामाजिक तथा हरेक क्षेत्रको विकास र प्रवद्र्धनमा जोड दिएको उम्मेदवार श्रेष्ठले बताउनुभयो ।

सोही कार्यक्रममा एमालेको तर्फबाट समानुपातिक उम्मेदवार तथा पूर्वमन्त्री नरदेवी पुनले सम्बोधन गर्दै विगतको समयदेखि नै एमालेले म्याग्दीमा विकासका धेरै कामहरु गरेकाले अबको निर्वाचनमा पनि एमालेलाई जिताएर विकास निर्माणका थप कामहरु गर्ने वातावरण बनाउने जिम्मा आम मतदाताहरुको रहेको बताउनुभयो । अबको निर्वाचनमा पनि सूर्यध्वजावाहक एमालेका उम्मेदवारलाई म्याग्देली जनताले जिताउने उहाँको भनाइ छ ।

नेकपा एमालेको केन्द्रीय सदस्य समेत रहनुभएकी समानुपातिक उम्मेदवार पुनले एमालेको नेतृत्वमा देश विकासले गति लिएको बताउँदै चीनसँग पारवहन सन्धी र सम्झौता गरेर नेपाललाई समुन्द्रको पहुँचमा जोड्ने महत्वपूर्ण उपलब्धि हासिल गरिएको बताउनुभयो । उहाँले वि.सं. २०५१ सालदेखि नेपालमा एमालेले विकासको सुरुवात गरेको बताउँदै सामाजिक सुरक्षाभत्ता, गाउँमा विकास बजेट पठाउने, संविधान जारी, संघीयताको कार्यान्वयनसँगै म्याग्दीलाई हिमाली जिल्ला बनाएर सोअनुसार सेवासुविधाको पहल गरिएको जानकारी दिनुभयो ।